Yuvadeepthy

1987 ഡിസംബർ 13 ന് പ്രകാശനം ചെയ്ത മാസികയില്‍ ഉണ്ടായിരുന്ന പരിശുദ്ധ ബാവായുടെ കല്പന. ഈ പരിശുദ്ധ പിതാവാണ് ഈ മാസിക പ്രകാശനം ചെയ്തത്....

1987 ഡിസംബർ 13-ന് പ്രകാശനം ചെയ്ത മാസികയിൽ ഉണ്ടായിരുന്ന പരിശുദ്ധ ബാവായുടെ കല്പന

ഭാരതത്തിലെ വിശുദ്ധ സ്തേഫാനോസിന്റെ നാമത്തിലുള്ള പ്രഥമ ദേവാലയമായ കുടശ്ശനാട് സെന്റ് സ്റ്റീഫൻസ് കത്തീഡ്രലിലെ പള്ളിഭാഗം യുവജനപ്രസ്ഥാനത്തിന്റെ മുഖപത്രം പുറത്തിറങ്ങിയിട്ട് 2026-ൽ നാല്പത്തിരണ്ടു പൂർത്തിയായി. അക്ഷരങ്ങൾ അനശ്വരങ്ങളാണെന്ന് തിരിച്ചറിവിൽ 1984-ൽ പള്ളിഭാഗം യുവജനപ്രസ്ഥാനമെന്ന യുവജനകൂട്ടായ്മയിൽ പിറവികൊണ്ട ഈ ശുശ്രൂഷ 42 വർഷങ്ങൾ പിന്നിടുമ്പോൾ സർവ്വശക്തനായ ദൈവത്തെ നന്ദി നിറഞ്ഞ ഹൃദയത്തോടെ സ്തുതിക്കുന്നു.

യുവദീപ്തി - ദീപ്തമായ ശുശ്രൂഷ

യുവദീപ്തിയുടെ തുടക്കം മുതൽ ഇക്കാലമത്രയും ഇതിനെ അക്ഷരശുശ്രൂഷയായിട്ടാണ് പള്ളിഭാഗം യുവജനപ്രസ്ഥാനം കരുതിയിട്ടുള്ളത്. കേവലം ഒരു ത്രൈമാസികയും, അതിലൊെന്തെങ്കിലും ഒക്കെ ചേർത്തുപ്പിച്ച് പുറത്തിറക്കുക, ലാഭം കണ്ടെത്തുക എന്നതായിരുന്നില്ല ഇതിന്റെ പിന്നിലെ ചേതോവികാരം. പൌരാണികമായ ഈ സഭയെയും അതിന്റെ സവിശേഷതകളെയും ലോകത്തിനും സമർപ്പിക്കുകയും പരിചയപ്പെടുത്തുകയും അതുവഴി ദൈവരാജ്യത്തിന്റെ മഹത്വത്തിനായി പ്രവർത്തിക്കുകയുമാണ് യുവദീപ്തിയിലൂടെ പള്ളിഭാഗം യുവജനപ്രസ്ഥാനം ഇക്കാലമത്രയും നിർവഹിച്ചിട്ടുള്ളത്.

വിനീതമായ തുടക്കം

'All great things have humble beginnings' എന്നാണല്ലോ മഹദ്വാക്യം. യുവദീപ്തിയെ സംബന്ധിച്ചിടത്തോളം ഇത് അക്ഷരാർത്ഥത്തിൽ യാഥാർത്ഥ്യമാണ്. ഈ ത്രൈമാസികയുടെ തുടക്കം ഒരു കൈയെഴുത്ത് സൃഷ്ടിയായിട്ടായിരുന്നു. അവിടെ നിന്നുള്ള വളർച്ചയുടെ പടവുകളിലാണ് നാം ഇന്ന് യുവദീപ്തിയെ സ്വീകരിക്കുന്നത്. കൈയെഴുത്ത് മാസികയിൽ നിന്ന് ഇന്റർനെറ്റ് എഡിഷൻ വരെയുള്ള വളർച്ചയുടെ പടവുകളിൽ തുണയായത് സർവ്വശക്തന്റെ കൃപ മാത്രം. ചരിത്ര രേഖകൾ പരിശോധിക്കുമ്പോൾ കൈയെഴുത്തുമാസികയായി രൂപപ്പെട്ടപ്പോൾ തന്നെ ക്രമീകൃതമായ ഒരു ഭരണസംവിധാനത്തിലൂടെയാണ് യുവദീപ്തിയുടെ പ്രവർത്തനങ്ങൾ മുന്നോട്ടു പോയിട്ടുള്ളത്. 30.6.1984-ൽ പാസാക്കിയ യുവദീപ്തിയുടെ നിയമാവലി ഈ കാര്യം തെളിയിക്കുന്നു. കാര്യങ്ങളെ ദീർഘവീക്ഷണത്തോടുകൂടി കാണുവാൻ കഴിഞ്ഞ ഒരു തലമുറയിൽ പിറവി എടുത്ത യുവദീപ്തിയെ ഇന്നലെയോളം മുന്നോട്ടു പോകുവാൻ ഒരു കാരണമായി തീർന്നുവെന്നതു യാഥാർത്ഥ്യമാണ്.

വളർച്ചയുടെ പടവുകളിൽ

1984-ൽ കൈയെഴുത്തു മാസികയായി രൂപം കൊണ്ട് യുവദീപ്തി പിന്നീട് വളർച്ചയുടെ വിവിധ പടവുകളിലൂടെ കടന്നുപോയി. 1987-ൽ കൈയെഴുത്തിൽ നിന്ന് അച്ചടിശാലയിലേക്ക് ഉള്ള മാറ്റം മാസികയുടെ രൂപത്തിലും ഭാവത്തിലും വിപ്ലവകരമായ മാറ്റം സൃഷ്ടിച്ചു. വായന കൂടുതൽ ആസ്വാദകരമാക്കുവാനും ഈ ശുശ്രൂഷ കൂടുതൽ ഫലപ്രദമാവാനും ഈ മാറ്റം ഉപകരിച്ചു.

വളർച്ചയുടെ ഈ ഘട്ടത്തിൽ സ്വാഭാവികമായും ഏതൊരു സംരംഭത്തിനും നേരിടേണ്ടിവന്ന പരീക്ഷകൾ യുവദീപ്തിക്കും നേരിടേണ്ടിവന്നുവെന്നുള്ളത് ഒരു ചരിത്രസത്യം. ഒരുപക്ഷേ, 'യുവദീപ്തി' എന്ന അക്ഷരശുശ്രൂഷ തന്നെ ഇല്ലാതാക്കാമായിരുന്ന തരത്തിൽ പ്രതിസന്ധികൾ പ്രക്ഷുബ്ധമായപ്പോൾ ഈ പ്രസ്ഥാനത്തിന് ദൈവത്തിന്റെ ഇടപെടൽ ഉണ്ടായത് മലങ്കര സഭയുടെ അന്നത്തെ കാതോലിക്കാ ബാവായിലൂടെയാണ്.

'യുവദീപ്തി'യുടെ ആശയങ്ങളും ആവിഷ്കാരങ്ങളും സൂക്ഷ്മം നിരീക്ഷിച്ചറിഞ്ഞ പരിശുദ്ധ ബാവാ തിരുമേനി യുവദീപ്തിയുടെ പ്രവർത്തനങ്ങളെ ശ്ലാഘിക്കുകയും, ഇതിന്റെ ആശയവിഷ്കാരങ്ങളെ ശക്തമായി പിന്തുണയ്ക്കുകയും ചെയ്തു. അത് പരിശുദ്ധ പിതാവ് കൈക്കൊണ്ട ധീരമായ നിലപാട് യുവദീപ്തിയെ ഭാവി ശോഭനമാക്കി. അതിലൂടെ യുവദീപ്തി പരിശുദ്ധ സഭയുടെ അംഗീകാരമുദ്ര ഏറ്റുവാങ്ങി 1987 ഡിസംബർ 13-ന് അച്ചടിക്കപ്പെട്ട യുവദീപ്തിയുടെ ആദ്യ ലക്കം പരിശുദ്ധ മാത്യൂസ് പ്രഥമാനൻ ബാവായുടെ തൃക്കരങ്ങളാൽ കുടശ്ശനാട് വച്ച് പ്രകാശനം ചെയ്തു.

ആദ്യകാലങ്ങളിൽ അച്ചു നിരത്തിയ അച്ചുകൂടങ്ങളിൽ യുവദീപ്തി അച്ചടി മഷി പുരണ്ടെങ്കിൽ പിന്നീട് വിവര സാങ്കേതികവിദ്യയുടെ വരവിലൂടെ ഓഫ്സെറ്റ് പ്രിന്റിംഗിന് വഴിമാറി. ഇതും വായന കൂടുതൽ ആസ്വാദകരമാക്കുവാൻ സഹായിക്കുന്നു. ഇന്ന്, അച്ചടിയോടൊപ്പം തന്നെ ഇന്റർനെറ്റ് എഡിഷനും പ്രസിദ്ധീകരിച്ചുവരുന്നു.

യുവദീപ്തിയുടെ തന്നെ ഉപപ്രസിദ്ധീകരണമായി പെരുന്നാളിനോടനുബന്ധിച്ച് 'ദിവ്യന്റെ പാതയിൽ' എന്ന പ്രസിദ്ധീകരണവും കുടശ്ശനാട് കത്തീഡ്രൽ പെരുന്നാളിനോടനുബന്ധിച്ച് പെരുന്നാൾ പതിപ്പും പ്രസിദ്ധീകരിച്ചുകൊടുണ്ട്.

'യുവദീപ്തി' ലിപിയും മുദ്രയും

യുവദീപ്തി ത്രൈമാസികയുടെ ചരിത്രത്തിലെ മറ്റൊരു വിസ്മയമാണ് അതിന്റെ പ്രത്യേക ലിപിയും ലോഗോയും. ഡി.ടി.പിയെക്കുറിച്ചും വിവിധ ലിപിഘടനകളെക്കുറിച്ചും അതിന്റെ വൈവിധ്യങ്ങളെക്കുറിച്ചുമൊക്കെ നാം പരിചയപ്പെടുത്തുന്നതിന് മുമ്പ് തന്നെ 'യുവദീപ്തി'ക്ക് ഒരു ലിപി വേണമെന്നും തീരുമാനിച്ചു ഒരു കലാകാരന്റെ സഹായത്തോടെ രൂപകൽപ്പന ചെയ്തതും ഒരു ലോഗോ പുറത്തിറക്കിയും ചരിത്രത്തിന്റെ ഏടുകളിൽ തിളങ്ങിനിൽക്കുന്ന ഒന്നാണ്.

വേറിട്ട വഴികൾ

യുവദീപ്തിയുടെ സഞ്ചാരപഥങ്ങൾ മുൻപ് കണ്ടുശീലിച്ച വഴികളായിരുന്നില്ല മറിച്ച് അക്ഷരവിപ്ലവങ്ങൾക്ക് നാന്ദികുറിക്കുവാൻ യുവദീപ്തിക്ക് കഴിഞ്ഞിട്ടുണ്ട്. എന്നും നിരാലംരുടെയും അവസരുടെയും വേദനിക്കുന്നവരുടെയും, അടിച്ചമർത്തപ്പെട്ടവരുടെയും പക്ഷത്തു നിന്നാണ് യുവദീപ്തി സംസാരിച്ചിട്ടുള്ളത്. അതുവഴി ദൈവരാജ്യ പ്രഘോഷണത്തിനും, പരിശുദ്ധ സഭയുടെ ആരാധനാ ജീവിതത്തിനും കൂടുതൽ ഊന്നൽ കൊടുക്കുവാൻ ശ്രമിച്ചിട്ടുണ്ട്.